Kieran Culkin

Kiran Kayl Kalkin (30 sentyabr 1982-ci il təvəllüdlü) həm səhnədə, həm də ekranda xoşagəlməz, lakin rəğbət doğuran obrazları canlandırması ilə tanınan amerikalı aktyordur. O, "Oskar", BAFTA, "Praymtaym Emmi" və iki "Qızıl Qlobus" mükafatına layiq görülüb. Kalkin karyerasına uşaq aktyor kimi off-Brodvey teatr tamaşalarında başlayıb. O, ilk dəfə böyük ekrana böyük qardaşı Makoley ilə birlikdə rol aldığı "Evdə tək" (1990) Milad komediyası ilə çıxıb. "İqbi aşağı enir" (2002) komediya-dramında istehzalı yeniyetmə obrazı ilə böyük uğur qazanan və ilk "Qızıl Qlobus" nominasiyasını əldə edən Kalkin, şəxsi problemləri səbəbindən ekranlara bir müddət ara verib. O, altı il sonra "Skott Pilgrim dünyaya qarşı" (2010) döyüş komediyasında Uolles Uells obrazı ilə kinoya qayıdıb. Kalkin "Əsl ağrı" (2024) dostluq komediyasında kədərli əmioğlu obrazına görə "Ən yaxşı ikinci plan aktyoru" nominasiyasında "Oskar" mükafatını qazanıb. Televiziyada isə Kalkin karyerasının yüksəlişini HBO-nun "Varislik" (2018–2023) dram serialında canlandırdığı Roman Roy obrazı ilə yaşayıb və bu rola görə "Dram serialında ən yaxşı baş rol aktyoru" nominasiyasında "Praymtaym Emmi" mükafatına layiq görülüb. Onun səslandırma işlərinə "Solar Opposites" (2022–hazırkı) və "Skott Pilgrim işə başlayır" (2023) daxildir. Səhnədə isə Kalkin Kennet Lonerqanın "Bu bizim gəncliyimizdir" əsərinin Vest-End və Brodvey tamaşalarında baş rolda çıxış edib. O, həmçinin Devid Memetin "Qlenqerri Qlen Ross" (2025) əsərinin Brodvey bərpa tamaşasında Riçard Roma obrazını canlandırıb.