Casey Affleck

Caleb Casey McGuire Affleck-Boldt (d. 12 avqust 1975) amerikalı aktyor və film prodüseridir. O, Akademiya Mükafatı, Britaniya Akademiya Film Mükafatı, Qızıl Qlobus Mükafatı və Satellite Mükafatı da daxil olmaqla müxtəlif mükafatların sahibidir. Karyerasına uşaq aktyor kimi başlamış, PBS televiziya filmi Lemon Sky (1988) və mini serial The Kennedys of Massachusetts-də (1990) rol almışdır. Daha sonra üç Gus Van Sant filmində: To Die For (1995), Good Will Hunting (1997) və Gerry (2002), həmçinin Steven Soderbergh-in komediya və soyğunçuluq trilogiyası olan Ocean's Eleven (2001), Ocean's Twelve (2004) və Ocean's Thirteen (2007) filmlərində rol alıb. İlk baş rolunu Steve Buscemi-nin müstəqil komediya-dramı Lonesome Jim-də (2006) oynamışdır. Affleck-in əsl sıçrayışı 2007-ci ildə vestern dramı The Assassination of Jesse James by the Coward Robert Ford-dakı performansı ilə Ən Yaxşı İkinci Plan Aktyoru nominasiyasında Akademiya Mükafatına namizəd göstərilməsi və qardaşı Ben Affleck-in rejissoru olduğu cinayət dramı Gone Baby Gone-da rol alması ilə baş vermişdir. 2010-cu ildə saxta sənədli film olan I'm Still Here-in rejissorluğunu etmişdir. Ardınca 2010-cu illərin əvvəllərində aralarında Tower Heist (2011), ParaNorman (2012) və Interstellar-ın (2014) da olduğu bir sıra uğurlu filmlərdə rol almış və müstəqil film olan Ain't Them Bodies Saints-dəki (2013) qanun qaçağı obrazı ilə xüsusilə təriflənmişdir. Affleck 2016-cı ildə Manchester by the Sea dram filmində rol almışdır. Övladlarını və qardaşını itirməyin kədərini yaşayan Lee Chandler obrazındakı performansı ilə geniş rəğbət qazanmış, Tənqidçilərin Seçimi Film Mükafatı, Qızıl Qlobus Mükafatı, Britaniya Akademiya Film Mükafatı və Ən Yaxşı Aktyor nominasiyasında Akademiya Mükafatını qazanmış, həmçinin Screen Actors Guild Mükafatına namizəd göstərilmişdir. Affleck 2017-ci ildə fövqəltəbii dram filmi A Ghost Story-dəki baş rolu ilə tənqidçilərin rəğbətini qazanmışdır.