Adam Sandler

Adam Richard Sandler (9 sentyabr 1966-cı il təvəllüdlü) amerikalı komediyaçı, aktyor və kino prodüseridir. O, 1990-1995-ci illərdə "Saturday Night Live" şousunun heyətində yer alıb, daha sonra Hollivudun bir çox filmində baş rolları ifa edib və bu filmlər dünya kassalarında ümumilikdə 2 milyard dollardan çox gəlir əldə edib. 2020-ci ildə Sandler təxminən 420 milyon dollar sərvətə sahib idi və Netflix ilə 250 milyon dollardan çox dəyəri olan növbəti dörd filmlik müqavilə imzalayıb. Sandlerin komediya rollarına "Billy Madison" (1995), "Happy Gilmore" (1996), "The Waterboy" (1998), "The Wedding Singer" (1998), "Big Daddy" (1999), "Mr. Deeds" (2002), "50 First Dates" (2004), "The Longest Yard" (2005), "Click" (2006), "Grown Ups" (2010), "Just Go with It" (2011), "Grown Ups 2" (2013), "Blended" (2014), "Murder Mystery" (2019) və "Hubie Halloween" (2020) daxildir. O, həmçinin "Eight Crazy Nights" cizgi filmində Davey, Whitey və Eleanore obrazlarını, "Hotel Transylvania" franşizasının ilk üç filmində (2012–2018) isə Drakulanı səsləndirib. "Jack and Jill" (2011) kimi bəzi komediya filmləri tənqid olunsa və nəticədə Sandler Sylvester Stallonedən sonra ən çox - doqquz "Qızıl Moruq" mükafatı və 37 nominasiya qazansa da, o, "Spanglish" (2004), "Reign Over Me" (2007) və "Funny People" (2009) dramedi filmlərindəki dramatik ifalarına görə tənqidçilərin rəğbətini qazanıb. O, həmçinin Paul Thomas Andersonun "Punch-Drunk Love" (2002), Noah Baumbachın "The Meyerowitz Stories" (2017) və Safdie qardaşlarının "Uncut Gems" (2019) kimi müəllif filmlərindəki baş rollarına görə yüksək qiymətləndirilib; sonuncu film ona "Ən yaxşı kişi baş rolu" nominasiyasında "Independent Spirit" mükafatını qazandırıb.