Lauryn Ajufo

Lorin Acufo ingilis aktrisasıdır. O, "Boiling Point" (2021) filmindəki roluna görə Britaniya Müstəqil Film Mükafatına namizəd göstərilib. 2022-ci ildə "Screen International" tərəfindən "Sabahın ulduzu" seçilib və "Evening Standard" qəzetinin diqqət yetirilməli olan londonlular siyahısına daxil edilib. Acufo Londonun Sautvark bölgəsində anadan olub. Əslən nigeriyalılıdır. O, BRIT Məktəbində təhsil alıb və "Theatre Royal Stratford East"də Gənclər Teatrına qoşulub. Acufo 2018-ci ildə monoloq müsabiqəsi vasitəsilə kəşf edilib. Filip Barantini onu 2019-cu ildə çəkdiyi "Boiling Point" qısametrajlı filmində Rene roluna dəvət edib və 2020-ci ildə debüt tammetrajlı filmi olan "Villain"də ona rol verib. Elə həmin il o, "Holby City" serialında qonaq aktrisa kimi çıxış edərək televiziya debütünü edib. Acufo 2021-ci ildə "Boiling Point"in tammetrajlı adaptasiyasında yenidən rol alıb, bu dəfə Andrea obrazını canlandıraraq Stiven Qrem ilə tərəf-müqabili olub. Bu ifasına görə tənqidçilərin rəğbətini qazanan aktrisa "Britaniya Müstəqil Film Mükafatı"nın "İlin kəşfi" nominasiyasına namizəd göstərilib. 2022-ci ildə Acufo Netflix-in elmi-fantastik serialı "The Last Bus"da Mişa Morris, ITVX və ITV2-nin yeniyetmə dramı "Tell Me Everything"də isə Niv obrazlarını canlandırıb. O, "Accused" filmində Şaneil Kular ilə baş rolları bölüşərək yenidən Barantini ilə iş birliyi edəcək. Həmçinin, aktrisanın Netflix-in "Everything Now" serialında və "Luther: The Fallen Sun" filmində yeni rolları gözlənilir.