Oscar Isaac

Oskar Ayzek Ernandes Estrada (9 mart 1979-cu il təvəllüdlü) amerikalı aktyordur. Çoxşaxəli istedadı ilə tanınan aktyor Hollivudda latın amerikalı personajlarla bağlı stereotipləri qırması ilə diqqət çəkir. O, 2017-ci ildə Vanity Fair tərəfindən öz nəslinin ən yaxşı aktyoru, 2020-ci ildə isə The New York Times tərəfindən 21-ci əsrin ən böyük 25 aktyorundan biri seçilib. Mükafatları arasında Qızıl Qlobus mükafatı və Praymtaym Emmi mükafatına namizədlik var. 2016-cı ildə Time jurnalının dünyanın ən nüfuzlu 100 insanı siyahısına daxil edilib. Qvatemalada anadan olan Ayzek körpə yaşlarında ailəsi ilə birlikdə ABŞ-a köçüb. Yeniyetməlik illərində pank qrupuna qoşulub, teatr tamaşalarında rol alıb və kiçik bir rolla kinodebütünü edib. Juilliard Məktəbinin məzunu olan Ayzek 2000-ci illərin böyük hissəsində filmlərdə xarakterik rollar ifa edib. İlk böyük rolu Bibliya mövzulu The Nativity Story (2006) dramında Yusif obrazı olub və o, Avstraliyanın Balibo (2009) filmində siyasi lider Xose Ramos-Horta obrazını canlandırdığına görə AACTA-nın "Ən yaxşı ikinci plan aktyoru" mükafatını qazanıb. Robin Hood (2010) və Drive (2011) filmlərindəki ikinci plan rolları ilə tanındıqdan sonra, Ayzek karyerasında əsas dönüş nöqtəsi olan Inside Llewyn Davis (2013) musiqili dramında eyniadlı müğənni obrazı ilə Qızıl Qlobus nominasiyasına layiq görülüb. Ayzekin karyerası A Most Violent Year (2014) kriminal dramı, Ex Machina (2015) trilleri və X-Men: Apocalypse (2016) superqəhrəman filmindəki baş rollarla yüksəlişə keçib. O, Star Wars sikvel trilogiyasında (2015–2019) Po Dameron rolu ilə dünya şöhrətli ulduza çevrilib. Ayzek ilk dəfə prodüserlik təcrübəsini sınaqdan keçirdiyi tarixi dram Operation Finale (2018), elmi-fantastik Annihilation (2018), Dune (2021) və Frankenstein (2025) filmlərində, həmçinin The Card Counter (2021) kriminal dramında və Spider-Man: Across the Spider-Verse (2023) animasiya filmində rol alıb. Televiziyada Ayzek üç mini-serialda baş rolu ifa edib: Nik Vasiksko obrazı ilə Qızıl Qlobus mükafatını qazandığı Show Me a Hero (2015), Scenes from a Marriage (2021) və Marvel Kinematoqrafiya Kainatının Moon Knight (2022) serialı. Teatr səhnəsindəki işlərinə Romeo and Juliet (2007), Hamlet (2017) və The Sign in Sidney Brustein's Window (2023) tamaşalarındakı baş rollar daxildir.