Adriana Barraza

Adriana Barraza González (5 mart 1956-cı il təvəllüdlü) meksikalı aktrisa, aktyorluq müəllimi və rejissordur. 1999-cu ildə rejissor Alejandro González Iñárritu onu "Amores perros" filmində Gael García Bernalın canlandırdığı obrazın anası roluna dəvət etdi. Film "Ən yaxşı xarici dildə film" nominasiyasında Oskar mükafatına namizəd göstərildi. 2006-cı ildə o, Iñárritu ilə yenidən "Babel" filmində əməkdaşlıq etdi və bu rola görə "Ən yaxşı ikinci plan qadın rolu" nominasiyasında Oskar mükafatına namizəd oldu. Barraza Meksikada "El Profe" kimi tanınan meksikalı rejissor Sergio Jiménez ilə tərəfdaşlığına görə "Usta Barraza" kimi tanınır. Onlar Mexiko şəhərində Aktyorluq Emalatxanası yaradaraq, özlərinin "Metod" aktyorluq versiyasını tədris edib inkişaf etdiriblər. Barraza karyerasına telenovella epizodlarına rejissorluq etməklə başlayıb və həmin aktyorlara məşqçilik də edib. 1990-cı illərdə isə o, kamera qarşısına keçmək qərarına gəlib. O, hazırda Mayami, Floridada "Adriana Barraza's Black Box" adlı öz aktyorluq məktəbini idarə edir. Məktəbin təlimatçıları arasında həyat yoldaşı Arnaldo və qızı Carolina da var.