Marisa Tomei

Marisa Tomei (d. 4 dekabr 1964) Oskar mükafatı laureatı, Qızıl Qlobus mükafatına namizəd olmuş amerikalı kino və teatr aktrisasıdır. Bruklin, Nyu-Yorkda anadan olmuş italyan əsilli aktrisa ingilis dili müəllimi Patrisiya "Addie" və vəkil Qari A. Tomeinin qızıdır. Edvard R. Murrou adına liseyi bitirdikdən sonra Boston Universitetində bir il təhsil alıb, daha sonra Nyu-York Universitetinə keçib. 1983-1985-ci illər arasında "As The World Turns" adlı sabun operasında rol alıb və burada bəyənilməsi ona 1987-1988-ci illərdə "A Different World" adlı sitkomda da rol tapmağa imkan verib. Bu serialdakı uğurundan sonra müxtəlif bədii filmlərdə də oynayan Tomei, 1992-ci ildə "My Cousin Vinny" filmində Mona Liza Vito rolunu canlandırıb və "Ən yaxşı ikinci plan qadın rolu" üzrə Oskar mükafatını qazanıb. Sənətçi ikinci dəfə 2001-ci ildə "In the Bedroom" filmi ilə Oskara namizəd olub. 2008-ci il istehsalı olan "Şampiyon" (The Wrestler) filmindəki performansı ilə karyerasının üçüncü Oskar namizədliyini əldə edib. Yenə "Şampiyon" filmi ilə sənətçi 2009-cu ildə BAFTA və Qızıl Qlobus mükafatlarına namizəd göstərilib. Aktrisanın digər Qızıl Qlobus namizədliyi 2002-ci ildə "In The Bedroom" (2001) filmi ilə gəlib. "Şampiyon" filmi ilə qazandığı digər mükafatlar bunlardır: Las-Veqas Film Tənqidçiləri Cəmiyyəti Mükafatları, San-Dieqo Film Tənqidçiləri Cəmiyyəti Mükafatları, San-Fransisko Film Tənqidçiləri Birliyi Mükafatı, Mərkəzi Ohayo Film Tənqidçiləri Birliyi və Florida Film Tənqidçiləri Birliyi mükafatı. 2000-ci ildə "What Women Want" filmindəki rolu ilə Satellite mükafatlarında "Ən yaxşı ikinci plan qadın rolu" kateqoriyasında namizəd göstərilib. Bu müddət ərzində Brodvey səhnəsində "Wait Until Dark" (1998) və "Salomé" (2003) tamaşalarında rol alıb. 2007-ci il istehsalı olan "Wild Hogs" filmində uğurlu performans nümayiş etdirib. Tomei, "Seinfeld" və "Rescue Me" seriallarında da rol alıb. Aktrisanı yeni Marvel Kinematoqrafiya Kainatında Hörümçək adamın xalası Mey Parker rolunda görəcəyik.