Juliette Lewis

Cülyett Leyk Lüis (21 iyun 1973-cü il təvəllüdlü) amerikalı aktrisa və müğənnidir. O, daha çox qaranlıq mövzulu filmlərdə canlandırdığı qeyri-adi obrazlarla tanınır. 1990-cı illərin əvvəllərində müxtəlif müstəqil və art-haus filmlərdə rol alan Lüis Amerika kinosunun "it girl"i (populyar siması) olmuşdur. O, Pasinetti mükafatı, bir "Oskar" nominasiyası, bir "Qızıl Qlobus" nominasiyası və bir "Praymtaym Emmi" nominasiyası daxil olmaqla bir çox mükafata layiq görülmüşdür. Karakter aktyoru Ceffri Lüisin qızı olan Lüis karyerasına 14 yaşında televiziyada başlamış, ilk böyük film rolunu isə "National Lampoon's Christmas Vacation" (1989) filmində Odri Qrisvold obrazı ilə almışdır. O, Martin Skorsezenin "Cape Fear" (1991) filminin remeykindəki rolu ilə beynəlxalq səviyyədə diqqət çəkmiş və bu rola görə "Oskar"ın "Ən yaxşı ikinci plan qadın oyunçusu" nominasiyasına, həmçinin eyni kateqoriyada "Qızıl Qlobus"a namizəd göstərilmişdir. "Cape Fear"ın uğurundan sonra Lüis Vudi Allenin "Husbands and Wives" (1992) filmində ikinci plan rolunu oynamış, ardınca sevgilisi seriyalı qatil olan uşaq xasiyyətli bir qadını canlandırdığı "Kalifornia" (1993) trillerində çəkilmişdir. O, həmçinin "What's Eating Gilbert Grape" (1993) dramında gənc səyyah rolunu ifa etmişdir. Lüis Oliver Stounun mübahisəli satirik cinayət filmi olan "Natural Born Killers" (1994) filmindəki baş rolu – Mellori Noks obrazı ilə daha çox diqqət çəkmiş və bu rola görə Venesiya Film Festivalında "Ən yaxşı aktrisa" nominasiyasında Pasinetti mükafatına layiq görülmüşdür. Daha sonra Ketrin Biqelounun "Strange Days" (1995) elmi-fantastik filmində və Robert Rodriqesin "From Dusk Till Dawn" (1996) vampir filmində rol almışdır. 1999-cu ildə Lüis "The Other Sister" dramında əqli qüsurlu bir qadın obrazı ilə baş rolda çıxış etmişdir. 2000-ci illərdə Lüis müstəqil və studiya filmlərində bir sıra ikinci plan rollarında görünmüş, 2003-cü ildə isə "Hysterical Blindness" (2002) filmindəki roluna görə "Emmi" mükafatının "Ən yaxşı ikinci plan qadın oyunçusu" nominasiyasına namizəd olmuşdur. O, "Old School" (2003) və "Starsky & Hutch" (2004) kimi komediyalarda ikinci plan rollarında çəkilməyə davam etmiş, 2003-cü ildə "Juliette and the Licks" rok qrupunu yaradaraq musiqi karyerasına başlamışdır; 2009-cu ildən isə solo ifaçı kimi musiqilərini təqdim etməyə başlamışdır. Sonrakı film rollarına "Whip It" (2009) idman komediyası, "Conviction" (2010) bioqrafik cinayət filmi, "The Switch" (2010) Amerika romantik komediyası və "August: Osage County" (2013) dramı daxildir. 2010-cu illərin sonlarından etibarən Lüis televiziyada daha çox fəaliyyət göstərərək "The Firm" (2012), "Wayward Pines" (2015), "Secrets and Lies" (2015–2016), "The Act" (2019) və "Yellowjackets" (2021) seriallarında baş rolları canlandırmışdır.