Rachel Weisz

Reyçel Hanna Vays (7 mart 1970-ci il təvəllüdlü) britaniyalı aktrisadır. Müstəqil filmlərdə və blokbasterlərdəki rolları ilə tanınan aktrisa "Oskar", "BAFTA", "Qızıl Qlobus", "Ekran Aktyorları Gildiyası" və "Lourens Olivye" mükafatları da daxil olmaqla bir çox mükafatlara layiq görülüb. Vays aktyorluq fəaliyyətinə 1990-cı illərin əvvəllərində teatr və televiziya tamaşaları ilə başlayıb, kinoda debütünü isə "Death Machine" (1994) filmi ilə edib. O, Noel Kovardın "Design for Living" pyesinin 1994-cü ildəki yeni tamaşasındakı roluna görə "Critics' Circle Theatre Award" mükafatını qazanıb və daha sonra 1999-cu ildə Donmar Warehouse-da Tennessi Uilyamsın "Suddenly Last Summer" dramında rol alıb. Onun kino karyerasında dönüş nöqtəsi Hollivudun "The Mummy" (1999) və "The Mummy Returns" (2001) döyüş filmlərində canlandırdığı Evelin Karnahan obrazı olub. Vays 2000-ci illərdə "Enemy at the Gates" (2001), "About a Boy" (2002), "Runaway Jury" (2003), "Constantine" (2005), "The Fountain" (2006), "Definitely, Maybe" (2008), "The Lovely Bones" (2009) və "The Whistleblower" (2010) kimi bir çox filmlərdə baş rolları ifa edib. O, 2005-ci ildə çəkilmiş "The Constant Gardener" trillerindəki fəal obrazına görə "Ən yaxşı ikinci plan qadın roluna görə Oskar" mükafatını, 2009-cu ildə "A Streetcar Named Desire" pyesinin yeni tamaşasında Blanş Dübua rolunu canlandırdığına görə isə "Ən yaxşı aktrisa" nominasiyasında "Lourens Olivye" mükafatını qazanıb. 2010-cu illərdə Vays "The Bourne Legacy" (2012) döyüş filmi və "Oz the Great and Powerful" (2013) fantastik filmi kimi böyük büdcəli layihələrdə rol almağa davam edib, həmçinin "The Deep Blue Sea" (2011), "Denial" (2016) və "The Favourite" (2018) kimi müstəqil filmlərdəki ifası ilə tənqidçilərin rəğbətini qazanıb. "The Favourite" filmindəki Sara Çörçill obrazına görə o, "BAFTA"nın "Ən yaxşı ikinci plan qadın rolu" mükafatına layiq görülüb və ikinci dəfə "Oskar"a namizəd olub. Vays Marvel Kinematoqrafiya Kainatının "Black Widow" (2021) filmində Melina Vostokoff obrazını canlandırıb və "Dead Ringers" (2023) triller mini-serialında əkiz mama-ginekoloq rollarında çəkilib.