Laura Linney

Laura Leggett Linney (5 fevral 1964-cü il təvəllüdlü) amerikalı aktrisadır. O, iki "Qızıl Qlobus" və dörd "Praymtaym Emmi" mükafatı da daxil olmaqla bir çox mükafatın sahibidir, həmçinin üç dəfə "Oskar" və beş dəfə "Toni" mükafatına namizəd göstərilib. Linney Brodvey debütünü 1990-cı ildə edib, daha sonra "The Crucible" (2002-ci il bərpası), "Sight Unseen" (2004), "Time Stands Still" (2010), "My Name Is Lucy Barton" (2020) tamaşalarının orijinal Brodvey quruluşları və "The Little Foxes" (2017-ci il bərpası) tamaşasındakı rollarına görə "Toni" mükafatına namizədliklər qazanıb. Televiziyada ilk "Emmi" mükafatını "Wild Iris" (2001) televiziya filminə görə alıb, ardınca "Frasier" (2003–04) sitkomu və "John Adams" (2008) mini-serialındakı rollarına görə bu mükafata layiq görülüb. 2010-2013-cü illərdə "Showtime" kanalının "The Big C" serialında baş rolda çəkilib və 2013-cü ildə bu rola görə dördüncü "Emmi" mükafatını qazanıb, 2017-2022-ci illərdə isə "Netflix"in cinayət janrında olan "Ozark" serialında rol alıb. Linney həm də tanınmış kino aktrisasıdır. O, kinodakı debütünü "Lorenzo's Oil" (1992) filmində kiçik bir rolla edib və sonradan "You Can Count on Me" (2000), "Kinsey" (2004) və "The Savages" (2007) dramlarındakı rollarına görə "Oskar" mükafatına namizəd göstərilib. O, həmçinin "Primal Fear" (1996), "The Truman Show" (1998), "Mystic River" və "Love Actually" (hər ikisi 2003), "The Squid and the Whale" (2005), "The Nanny Diaries" (2007), "Hyde Park on Hudson" (2012), "Mr. Holmes" (2015), "Sully" və "Nocturnal Animals" (hər ikisi 2016) filmlərindəki ifaları ilə tanınır.