David Harbour

David Kenneth Harbour 10 aprel 1975-ci ildə ABŞ-ın Nyu-York ştatının White Plains şəhərində dünyaya gəlib. 1997-ci ildə Dartmouth Kollecini bitirdikdən sonra aktyorluq karyerasına Nyu-York teatr səhnələrində başlayıb. 1999-cu ildə Brodveydə "The Rainmaker" tamaşası ilə peşəkar debütünü edib, 2005-ci ildə isə "Who's Afraid of Virginia Woolf?" (Kim qorxar xain qurdun adından?) tamaşasındakı performansı ilə Tony mükafatına namizəd göstərilib. Karyerasının əvvəllərində kino və televiziyada müxtəlif ikinci dərəcəli rollarda yer alıb. "Law & Order" (Qanun və Nizam) serialının müxtəlif versiyalarında görünüb. Kinoda isə "Brokeback Mountain" (Brokeback Dağı) (2005), "War of the Worlds" (Dünyalar müharibəsi) (2005) və Kate Winslet ilə Leonardo DiCaprionun yenidən bir araya gəldiyi "Revolutionary Road" (Xəyallar arxasınca) (2008) kimi filmlərdə kiçik, lakin diqqətçəkən rollar alıb. 2008-ci ildə "Quantum of Solace" filmində korrupsioner Mərkəzi Kəşfiyyat İdarəsi agenti Gregg Beam obrazını canlandırıb. Harbour 2010-cu illərdə "The Newsroom", "Manhattan" və "State of Affairs" kimi seriallarda təkrarlanan rollar alaraq televiziyadakı mövqeyini möhkəmləndirib. "End of Watch" (Təhlükəli təqib) (2012), "The Equalizer" (Ədalət) (2014) və "Suicide Squad" (Gerçək pislər) (2016) kimi döyüş filmlərində də ikinci dərəcəli rollarda yer alıb. Lakin David Harbouru qlobal bir ulduza çevirən və karyerasının ən ikonik rolunu qazandıran yapım 2016-cı ildə başlayan Netflix-in fenomen serialı "Stranger Things" oldu. Serialda canlandırdığı, keçmişi travmalarla dolu, lakin xeyirxah polis şefi Jim Hopper obrazı həm izləyicilərin, həm də tənqidçilərin böyük bəyənisini qazandı. Bu rolu ilə 2017 və 2018-ci illərdə iki dəfə Primetime Emmy mükafatına və bir dəfə Qızıl Qlobus mükafatına namizəd göstərilib. "Stranger Things"in gətirdiyi böyük uğurdan sonra Harbour kinoda baş rollara keçid etdi. 2019-cu ildə məşhur komiks qəhrəmanına əsaslanan "Hellboy" (Cəhənnəm uşağı) filminin yenidən çəkilən versiyasında baş rolu oynadı. 2021-ci ildə Marvel Kinematoqrafiya Kainatına qoşularaq "Black Widow" filmində və daha sonra "Thunderbolts*" (2025) filmində də yer alacağı, sevilən rus super-əsgəri Red Guardian (Alexei Shostakov) obrazını canlandırdı. 2023-cü ildə isə "Gran Turismo" filmində, həmçinin "Violent Night" (Vəhşi gecə) (2022) adlı döyüş-komediya filmində Şaxta baba obrazını canlandırıb.