Halle Berry

Helli Mari Berri (doğum adı Mari Helli Berri; 14 avqust 1966) amerikalı aktrisadır. Karyerasına model kimi başlayan Berri bir neçə gözəllik müsabiqəsində iştirak edərək 1986-cı ildə "Miss Ohayo" seçilib, həmin il "Miss ABŞ" müsabiqəsində ikinci yeri tutub və "Miss Dünya 1986" müsabiqəsində altıncı olub. Onun kinodakı ilk böyük uğuru Eddi Mörfi ilə birlikdə rol aldığı "Bumeranq" (1992) romantik komediyası olub. Bu uğur ona "Daşdövrlülər" (1994) və "Bulvort" (1998) filmlərində, eləcə də "Doroti Dendricin təqdimatı" (1999) televiziya filmində rollar qazandırıb; sonuncu filmə görə o, "Praymtaym Emmi" və "Qızıl Qlobus" mükafatlarına layiq görülüb. Berri 2000-ci illərdə Hollivudun ən çox qazanan aktrisalarından biri kimi özünü təsdiqləyib. "Canavarın rəqsi" (2001) romantik dramında çətinliklərlə üzləşən dul qadın obrazı ilə Berri "Oskar"ın "Ən yaxşı qadın roluna görə" mükafatını qazanan ilk və yeganə afroamerikalı, həmçinin ilk rəngli dərili qadın olub. Berri "İks-adamlar" film seriyasının dörd hissəsində (2000–2014) Storm, "Parol: Qılıncbalıq" (2001) trillerində cinayətkarın köməkçisi, "Başqa gün öl" (2002) filmində Bond qızı Cinks, "Qotika" (2003) filmində psixiatr və çox tənqid olunan "Pişik qadın" (2004) filmində baş rol kimi yüksək profilli obrazları canlandırıb. Sonrakı illərdə müxtəlif tənqidi və kommersiya rəyləri ilə qarşılanan aktrisanın bu dövrdəki diqqətçəkən filmləri arasında "Mükəmməl yad" (2007), "Bulud atlası" (2012) və "Zəng" (2013) yer alır. 2014-cü ildə "606 Films" adlı prodüser şirkətini quran Berri, özünün də rol aldığı bir sıra layihələrin, o cümlədən CBS-in "Ekstant" (2014–2015) elmi-fantastik serialının istehsalında iştirak edib. O, "Kinqsman: Qızıl dairə" (2017) və "Con Uik 3: Parabellum" (2019) döyüş filmlərində çəkilib, Netflix-in "Göyərmiş" (2020) dramı ilə isə rejissor kimi debüt edib. Berri 1996-cı ildən "Revlon" brendinin simasıdır. O, keçmişdə beysbolçu Devid Castis, müğənni-bəstəkar Erik Bene və aktyor Olivye Martines ilə evli olub. Berrinin iki övladı var. O, ilk övladını keçmiş tərəfdaşı, model Qabriel Obri ilə, ikinci övladını isə Martines ilə birlikdə böyüdüb.