Kate Mara

Kate Rooney Mara 27 fevral 1983-cü ildə Bedford, Nyu-Yorkda dünyaya gəlib. Bacısı Rooney Mara kimi o da Amerika idman tarixinin ən köklü iki ailəsindən gəlir; "New York Giants"ın qurucusu Mara ailəsinin və "Pittsburgh Steelers"in qurucusu Rooney ailəsinin üzvüdür. Səhnə sənətinə olan marağı çox gənc yaşlarında yerli teatrlarda və məktəb tamaşalarında başlayıb. "Səfillər" kimi müzikallardan təsirlənərək aktyorluğa yönələn Mara hələ 14 yaşı olanda bir menecerlə müqavilə bağlayıb. Nyu-York Universitetinin Tisch İncəsənət Məktəbinə qəbul olunmasına baxmayaraq, peşəkar aktyorluq karyerasına fokuslanmaq üçün təhsilinə ara verməyə üstünlük verib. Karyerasına 1997-ci ildə "Law & Order" serialındakı qonaq aktyor rolu ilə başlayan Mara kinodakı ilk təcrübəsini Harrison Fordun baş rolda oynadığı "Gerçəyin Pəşində" (Random Hearts) (1999) filmi ilə yaşayıb. 2000-ci illərin əvvəllərində "Nip/Tuck", "Everwood" və "CSI" kimi populyar televiziya seriallarında yer alaraq sektorda təcrübə qazanıb. Kinoda ilk diqqətçəkən uğuru Ang Linin rejissoru olduğu və Oskar mükafatlı "Qozbel dağ" (Brokeback Mountain) (2005) filmində Heath Ledgerin obrazının 19 yaşlı qızını canlandırması ilə reallaşıb. Bu roldan sonra "24" serialında analitik Shari Rothenberg obrazı və Mark Wahlberg ilə birlikdə rol aldığı "Tetikçi" (Shooter) (2007) döyüş filmi ilə tanınırlığını artırıb. Kate Maranın karyerasındakı əsl böyük sıçrayış televiziya dünyasındakı səs-küylü layihələrlə gəlib. Ryan Murphynin "American Horror Story: Murder House" (2011) serialında canlandırdığı takıntılı Hayden McClaine obrazı ilə təriflər qazanıb. Lakin onu qlobal miqyasda ulduz edən rol Netflix-in ilk böyük orijinal layihəsi olan siyasi triller serialı "House of Cards" (2013-2014) olub. İddialı jurnalist Zoe Barnes obrazına həyat verdiyi bu serialdakı performansı ona "Primetime Emmy" mükafatlarında "Ən yaxşı qonaq aktrisa" nominasiyasını qazandırıb. Televiziyadakı bu uğurundan sonra böyük büdcəli Hollivud layihələrində önəmli rollar üstlənib. Ridley Scottun rejissoru olduğu və böyük rəğbət qazanan "Marslı" (The Martian) (2015) filmində kompüter mütəxəssisi astronavt Beth Johansseni canlandırıb. Elə həmin il "Fantastik dördlü" (Fantastic Four) filmində Sue Storm (Görünməz qadın) obrazı ilə superqəhrəman dünyasına addım atıb. Müstəqil kinoda və dramatik rollarda da istedadını nümayiş etdirən Mara real hekayədən uyğunlaşdırılan "Megan Leavey" (2017) filmində baş rolu üstlənib və "Chappaquiddick" (2017) filmində Mary Jo Kopechne obrazını canlandırıb. Yaxın dövrdə həm baş rolunu oynadığı, həm də prodüserliyini etdiyi mübahisəli mini-serial "A Teacher" (2020) və FTB trilleri "Class of '09" (2023) ilə karyerasını davam etdirir. Şəxsi həyatında ciddi heyvan hüquqları müdafiəçisi olan Mara həmkarı Jamie Bell ilə evlidir.