Sarah Jessica Parker

Sarah Jessica Parker (25 mart 1965-ci il təvəllüdlü) amerikalı aktrisa və televiziya prodüseridir. O, altı "Qızıl Qlobus" və iki "Praymtaym Emmi" mükafatı da daxil olmaqla, çoxsaylı mükafatların sahibidir. Time jurnalı 2022-ci ildə onu dünyanın ən nüfuzlu 100 insanından biri elan edib. O, HBO telekanalının "Sex and the City" (1998–2004) serialında canlandırdığı Carrie Bradshaw rolu ilə tanınır. Bu rola görə o, iki "Emmi", komediya serialında ən yaxşı aktrisa nominasiyasında dörd "Qızıl Qlobus" və üç "Ekran Aktyorları Gildiyası" mükafatı qazanıb. Serialın yayımlandığı dövrdə böyük populyarlıq qazanan bu obraz sonradan Amerika televiziyasının ən böyük qadın personajlarından biri kimi tanınıb. O, daha sonra bu rolu "Sex and the City" (2008) və "Sex and the City 2" (2010) filmlərində, eləcə də "And Just Like That..." (2021–hazırda) televiziya şousunda yenidən canlandırıb. Parker Brodveydə debütünü 11 yaşında, 1976-cı ildə "The Innocents" tamaşasının yenidən səhnələşdirilməsi ilə edib, daha sonra 1979-cu ildə Brodveyin "Annie" müziklində baş rolda çıxış edib. O, ilk böyük film rollarını 1984-cü ildə çəkilmiş "Footloose" və "Firstborn" dramlarında alıb. Onun digər film rollarına "L.A. Story" (1991), "Honeymoon in Vegas" (1992), "Hocus Pocus" (1993), "Ed Wood" (1994), "The First Wives Club" (1996), "The Family Stone" (2005), "Failure to Launch" (2006), "Did You Hear About the Morgans?" (2009) və "New Year's Eve" (2011) daxildir. 2012-ci ildə Parker "Sex and the City" serialından sonra ilk dəfə televiziyaya qayıdaraq, FOX kanalının "Glee" serialının üç epizodunda Isabelle Wright obrazını canlandırıb. O, HBO-nun "Divorce" (2016–2019) serialında Frances Dufresne rolunda çəkilib və bu rola görə "Qızıl Qlobus" mükafatına namizəd olub. 2005-ci ildən bəri o, HBO və digər kanallar üçün məzmun hazırlayan özünün "Pretty Matches" prodüser şirkətini idarə edir.