Tom Jones

Tom Jones (əsl adı Tomas Con Vudvord, Uelsin Qlamorqan bölgəsindəki Pontipridd şəhərinin Trefforest qəsəbəsində anadan olub) uelsli müğənni və aktyordur. Peşəkar səhnədə Tom Jones kimi tanınan ser Tomas Con Vudvord (OBE) karyerasına 1960-cı illərin ortalarında bir sıra hit mahnılarla başlayıb. O, mütəmadi olaraq qastrol səfərlərinə çıxır və Las-Veqasda çıxışlar edir. AllMusic-dən Stiven Tomas Erlevayn Jonesun səsini "gur və möhkəm bariton" kimi xarakterizə edib. Onun ifa etdiyi janrlara pop, R&B, şou musiqiləri, kantri, dens, soul və qospel daxildir. 2008-ci ildə New York Times qəzeti Jonesu musiqi sahəsində "forma dəyişdirən" adlandırıb və onun "ruh oxşayan xırıltılı səsdən pop üslubunda zümzüməyə keçə bilən, həm kobud, həm də xoşagələn səsə malik olduğunu" qeyd edib. Jones 100 milyondan çox albom satıb, Böyük Britaniyada 36, ABŞ-da isə 19 hit mahnısı Top 40 siyahısına düşüb. Bunların arasında "It's Not Unusual", "What's New Pussycat", 1965-ci il Ceyms Bond filmi olan "Thunderball"-un əsas musiqisi, "Green, Green Grass of Home", "Delilah", "She's a Lady", "Kiss" və "Sex Bomb" kimi mahnılar var. Jones aktyorluq debütünü 1979-cu ildə çəkilmiş "Pleasure Cove" televiziya filmində baş rolu oynamaqla edib. O, Tim Burtonun 1996-cı il istehsalı olan "Mars Attacks!" filmində öz obrazını canlandırıb. 1970-ci ildə "This Is Tom Jones" televiziya şousunun aparıcısı kimi "Qızıl Qlobus" mükafatının "Ən yaxşı aktyor – televiziya serialı, musiqili və ya komediya" nominasiyasına namizəd olub. 2012-ci ildə "Playhouse Presents" serialının bir epizodunda rol alıb. Jones 1966-cı ildə "Qremmi" mükafatının "Ən yaxşı yeni ifaçı" nominasiyasını, 1989-cu ildə MTV Video Musiqi mükafatını, həmçinin iki "Brit" mükafatını – 2000-ci ildə "Ən yaxşı britaniyalı kişi ifaçı" və 2003-cü ildə "Musiqiyə görkəmli töhfə" mükafatlarını qazanıb. Jones 1998-ci ildə Britaniya İmperiyası Ordeni (OBE) ilə təltif edilib, 2005-ci ildə isə musiqi sahəsindəki xidmətlərinə görə Kraliça II Elizabet tərəfindən cəngavər titulu alıb. Jones 2012-ci ildən (2016-cı il istisna olmaqla) "The Voice UK" televiziya istedad şousunda münsif kimi çıxış etdiyi üçün 2010-cu illərdə yenidən böyük populyarlıq qazanıb.