Guy Pearce

Qay Edvard Pirs (5 oktyabr 1967-ci il təvəllüdlü) avstraliyalı aktyor və musiqiçidir. O, "Praymtaym Emmi" mükafatı, həmçinin "Oskar" mükafatına namizədlik, iki "Qızıl Qlobus" və bir "BAFTA" mükafatı da daxil olmaqla, müxtəlif mükafatlara layiq görülüb. Karyerasına Avstraliyanın "Neighbours" (1986–1989) televiziya serialında Mayk Yanq obrazını canlandıraraq başlayıb. Pirs beynəlxalq şöhrəti "The Adventures of Priscilla, Queen of the Desert" (1994) filmindəki uğurlu rolu ilə qazanıb. Daha sonra o, Körtis Hansonun "L.A. Confidential" (1997) kriminal noir filmində Ed Eksli obrazını, Kristofer Nolanın "Memento" (2000) psixoloji trillerində isə qısamüddətli yaddaş itkisindən əziyyət çəkən bir şəxsi canlandırıb. O, həmçinin "The Time Machine" (2002), "Bedtime Stories" (2008), "The Road" (2009), "The Hurt Locker" (2009), "The King's Speech" (2010) və "Lawless" (2012) filmlərində rol alıb. Pirs "Prometheus" (2012) və "Alien: Covenant" (2017) filmlərində Piter Veyland, "Marvel"in "Iron Man 3" (2013) döyüş filmində Oldriç Killian, "Mary Queen of Scots" (2018) bioqrafik filmində isə Uilyam Sesil obrazlarını canlandırıb. Avstraliya kinosunda isə Pirs "The Proposition" (2005), "Animal Kingdom" (2010) və "The Rover" (2014) filmlərində çəkilib. "The Brutalist" (2024) filmindəki ifasına görə o, "Oskar"ın "Ən yaxşı ikinci plan aktyoru" nominasiyasına layiq görülüb. 2012-ci ildən bəri o, avstraliyalı cinayət romanları yazıçısı Piter Templin "Jack Irish" hekayələrinin televiziya adaptasiyalarında baş rolu ifa edir. Pirs "HBO"nun "Mildred Pierce" (2011) və "Mare of Easttown" mini-seriallarında çəkilib. Birinci serial ona "İkinci planda ən yaxşı aktyor" kateqoriyasında "Praymtaym Emmi" mükafatını qazandırıb.