Bailee Madison

Bailee Madison Riley (15 oktyabr 1999-cu il təvəllüdlü) amerikalı aktrisa və müğənnidir. O, ilk dəfə fantastik dram filmi olan Bridge to Terabithia-dakı (2007) May Belle Aarons rolu ilə rəğbət qazanıb. Madison müharibə dramı Brothers-da (2009) Isabelle, qorxu filmi Don't Be Afraid of the Dark-da (2010) Sally Hurst, romantik komediya filmi Just Go with It-də (2011) Maggie, komediya filmi Parental Guidance-da (2012) Harper Simmons, ailə filmi Cowgirls 'n Angels-da (2012) Ida Clayton, fantastik film Northpole-da (2014) Clementine, slasher filmi The Strangers: Prey at Night-da (2018) Kinsey və Netflix filmi A Week Away-də (2021) Avery rolları ilə daha da tanınıb. Televiziyada fantastik sitkom Wizards of Waverly Place-də (2011) Maxine Russo, fantastik dram serialı Once Upon a Time-da (2012–2016) gənc Ağbəniz, sitkom Trophy Wife-da (2013–2014) Hillary Harrison və dram serialı The Fosters-da (2014–2016) Sophia Quinn obrazlarını canlandırıb. Madison 2015-ci ildən 2021-ci ilə qədər Hallmark Channel-ın komediya-dram serialı Good Witch-də Grace Russell rolunu oynayıb. 2022-ci ildə Pretty Little Liars-ın spin-offu olan qorxu-triller serialı Pretty Little Liars: Original Sin-də Imogen Adams roluna çəkilməyə başlayıb.