Orhan Aksoy

Orhan Aksoy 1 yanvar 1930-cu ildə Bursada anadan olub. İstanbul Kişi Liseyində təhsil alıb. Liseyi bitirdikdən sonra hərbi xidmətini başa vurub və kinoteatrlarda işləməyə başlayıb. 1948-ci ildə Beyoğlu Şık və Saray kinoteatrlarında kinomexanik işləyib. 1952-ci ildə İpek Film studiyasında montajçı kimi çalışıb. Ssenari yazmağa başlayıb. Hulki Sanerə assistentlik edib. 1963-cü ildə baş rollarını Ayhan Işık və Ajda Pekkanın ifa etdiyi "Şıpsevdi" filmi ilə rejissorluğa keçib. 1960-cı illərdən 90-cı illərə qədər türk kinosunda ən məhsuldar film çəkən rejissorlardan biri olub. Osman Fahir Seden, Nevzat Pesen, Hulki Saner və Nejat Saydam ilə birlikdə "Yeşilçam Beşlisi" adlandırılan qrupa daxil edilib. Rejissoru olduğu klassik Yeşilçam melodramları ilə bu janrın yadda qalan simalarından birinə çevrilib. Romantik melodramlar çəkdiyi üçün "eşq filmlərinin rejissoru" kimi tanınıb. "Vurun Kahpeye" (1964), "Hıçkırık" (1965), "Kezban" (1968) və "Kınalı Yapıncak" (1969) kimi əsərləri böyük kommersiya uğuru qazanıb. Baş rollarını Münir Özkul və Adile Naşitin ifa etdiyi "Aile Şerefi" (1976) və "Neşeli Günler" (1978) filmləri ilə insanları yenidən kinoteatrlara cəlb edib. 1994-cü ildə çəkdiyi "Yumuşak Ten" filmi ilə 31-ci Antalya Qızıl Portağal Film Festivalında "Ən yaxşı ikinci film" mükafatını qazanıb. Bu filmdən sonra televiziyaya keçid edib. 22 yanvar 2008-ci ildə, iki həftə reanimasiyada qaldıqdan sonra İstanbulda vəfat edib.