Michael Gambon

Ser Maykl Con Qembon (19 oktyabr 1940 – 27 sentyabr 2023) irland-ingilis aktyoru idi. Qembon aktyorluq karyerasına Lourens Olivye ilə birlikdə Kral Milli Teatrının ilk üzvlərindən biri kimi başlayıb. Altı onillik karyerası ərzində o, üç Olivye mükafatı və dörd BAFTA televiziya mükafatı qazanıb. 1998-ci ildə dram sənətinə verdiyi töhfələrə görə Kraliça II Elizabet tərəfindən cəngavər titulu ilə təltif edilib. Qembon Uilyam Şekspirin "Otello", "Hamlet", "Makbet" və "Koriolan" kimi bir çox əsərinin tamaşalarında rol alıb. On üç dəfə Olivye mükafatına namizəd göstərilən Qembon, "A Chorus of Disapproval" (1985), "A View from the Bridge" (1987) və "Man of the Moment" (1990) tamaşalarındakı rollarına görə üç dəfə bu mükafata layiq görülüb. 1997-ci ildə Qembon Devid Heyrin "Skylight" tamaşası ilə Brodvey debütünü edib və "Pyesdə ən yaxşı aktyor" nominasiyasında Toni mükafatına namizəd olub. Qembon kino debütünü "Otello" (1965) filmi ilə edib. Onun digər diqqətçəkən filmləri arasında "The Cook, the Thief, His Wife & Her Lover" (1989), "The Wings of the Dove" (1997), "The Insider" (1999), "Gosford Park" (2001), "Amazing Grace" (2006), "The King's Speech" (2010), "Quartet" (2012) və "Victoria & Abdul" (2017) yer alır. Qembon, həmçinin Ues Andersonun "The Life Aquatic with Steve Zissou" (2004) və "Fantastic Mr. Fox" (2009) filmlərində də rol alıb. O, 2002-ci ildə vəfat edən Riçard Harrisdən sonra 2004-2011-ci illərdə "Harri Potter" film seriyasında Albus Dambldor obrazını canlandıraraq daha geniş şöhrət qazanıb. Televiziya sahəsindəki işlərinə görə o, "The Singing Detective" (1986), "Wives and Daughters" (1999), "Longitude" (2000) və "Perfect Strangers" (2001) filmlərinə görə dörd BAFTA mükafatı alıb. O, həmçinin "Path to War" (2002) və "Emma" (2009) filmlərinə görə iki dəfə Praymtaym Emmi mükafatına namizəd göstərilib. Qembonun digər mühüm layihələri arasında "Cranford" (2007) və "The Casual Vacancy" (2015) var. 2017-ci ildə o, İrlandiya Kino və Televiziya Akademiyasının "Ömürlük nailiyyət" mükafatına layiq görülüb. 2020-ci ildə "The Irish Times" qəzetinin İrlandiyanın ən böyük kino aktyorları siyahısında 27-ci yerdə qərarlaşıb.