Ray Stevenson

Rey Stivenson (25 may 1964 – 21 may 2023) kino, televiziya və teatr aktyoru idi. O, 1972-ci ildə, səkkiz yaşı olanda ailəsi ilə birlikdə İngiltərənin Nyukasl-apon-Tayn şəhərinin Leminqton qəsəbəsinə, daha sonra isə böyüyüb boya-başa çatdığı Nortumberlendin Kramlinqton şəhərinə köçüb. Kral Hərbi Hava Qüvvələrinin pilotu olan ata və irlandiyalı ananın üç oğlundan ikincisi olan Stivenson uşaqlıqda aktyor olmağı xəyal edirdi, lakin bu xəyalın mümkünsüz olduğunu düşünürdü. Buna görə də digər sevdiyi sahəyə – incəsənətə üz tutdu və rəssamlıq məktəbinə daxil oldu. O, Londonda bir memarlıq firmasında interyer dizayneri işləyərkən 25 yaşında aktyorluğu sınamaq qərarına gəldi. Nəhayət, Bristol Old Vic Teatr Məktəbinə daxil oldu və 29 yaşında oranı bitirdi. 90-cı illərin əvvəllərində kino karyerasına başladı. O, bir neçə televiziya filmində rol aldı; bunlardan biri Klayv Ouen, Ketrin Zeta-Cons və Stiven Makintoşla birlikdə çəkildiyi "The Return of the Native" (1994) filmi idi. O, həmçinin "The Theory of Flight" (1998), "Greenwich Mean Time" (1999), "Green-Eyed Monster" (2001) (TV) filmlərində rol aldı və bir çox serialda qonaq aktyor kimi çıxış etdi. Nəhayət, o, beynəlxalq səviyyədə tanınmasını 2004-cü ildə çəkilən "King Arthur" filmi ilə qazandı. Burada o, sakit, lakin sadiq cəngavər Dagonet rolunu canlandırdı və yenidən Klayv Ouen (Artur rolunda), Kira Naytli, Yoan Qriffit, Mads Mikelsen, Rey Uinston və Stellan Skarsqardla tərəf-müqabili oldu. Bir neçə televiziya filmindən sonra Stivensonun populyarlığı hər yeni filmlə artmağa başladı. Lakin əsl şöhrəti ona HBO-nun "Rome" (2005–2007) serialında Kevin MakKiddin tərəf-müqabili kimi canlandırdığı gülməli, lakin qəhrəmancasına cəsur legioner Titus Pullo rolu gətirdi. Onun digər iki məşhur rolu "Outpost" (2008) döyüş-qorxu filmində və komiks qəhrəmanı "The Punisher / Frank Castle" obrazını canlandırdığı olduqca sərt "Punisher: War Zone" (2008) filmində idi. Bu filmdə o, Dominik Uest (Jigsaw), Daq Hatçison, Kolin Salmon, Ueyn Nayt (Microchip), Deş Mihok (Det. Marin Soap) və Culi Benz ilə birlikdə rol alıb. Qeyd etmək lazımdır ki, Stivenson teatrda da fəaliyyət göstərib. O, 2000-ci ildə York Minsterdə keçirilən "York Mystery Plays" tamaşasında İsa rolunu oynayıb. 2001-ci ildə Londondakı Albery Teatrında Kevin Elyotun "Mouth to Mouth" pyesində Lindsi Dunkan və Maykl Meloni ilə birlikdə Rocer rolunu ifa edib. Onun ən məşhur teatr rolu isə, yəqin ki, 2003-cü ildə Kral Milli Teatrında Con Uebsterin "The Duchess of Malfi" pyesində Canet MakTir ilə birlikdə canlandırdığı Kardinal obrazı idi. Stivenson və sevgilisi Elizabetta Karçianın 2007-ci ildə anadan olmuş Sebastiano Derek Stivenson adlı bir oğlu var. Aktyorluqdan əlavə, o, incəsənəti sevirdi və akvarel boya ilə rəsm çəkməyə böyük həvəsi var idi.