Jane Fonda

Ceyn Seymur Fonda (21 dekabr 1937-ci il təvəllüdlü) amerikalı aktrisa, fəal və keçmiş modeldir. O, iki "Oskar", iki Britaniya Film və Televiziya Sənəti Akademiyası mükafatı, yeddi "Qızıl Qlobus", bir "Emmi", Amerika Film İnstitutunun "Həyat nailiyyəti" mükafatı, "Qızıl Şir" fəxri mükafatı, "Fəxri Qızıl Palma Budağı" və Sesil B. DeMill mükafatı daxil olmaqla, çoxsaylı mükafatların sahibidir. Cəmiyyətin tanınmış simalarından olan Frensis Ford Seymur və aktyor Henri Fondanın qızı olan Ceyn Fonda aktyorluq debütünü 1960-cı ildə Brodveydə nümayiş olunan "There Was a Little Girl" tamaşası ilə edib və bu rola görə "Toni" mükafatının "İkinci planda ən yaxşı aktrisa" nominasiyasına layiq görülüb. Elə həmin il o, "Tall Story" romantik komediyası ilə ekranlarda debüt edib. Fonda 1960-cı illərdə "Period of Adjustment" (1962), "Sunday in New York" (1963), "Cat Ballou" (1965), "Barefoot in the Park" (1967) və "Barbarella" (1968) komediyaları ilə məşhurlaşıb. Onun ilk həyat yoldaşı "Barbarella" filminin rejissoru Roje Vadim olub. Yeddi dəfə "Oskar"a namizəd göstərilən aktrisa ilk nominasiyasını "They Shoot Horses, Don't They?" (1969) filminə görə alıb və 1970-ci illərdə "Klute" (1971) və "Coming Home" (1978) filmlərinə görə iki dəfə "Ən yaxşı qadın roluna görə" "Oskar" mükafatını qazanıb. Onun digər nominasiyaları "Julia" (1977), "The China Syndrome" (1979), "On Golden Pond" (1981) və "The Morning After" (1986) filmləri ilə bağlı olub. "Fun with Dick and Jane" (1977), "California Suite" (1978), "The Electric Horseman" (1979) və "9 to 5" (1980) kimi ardıcıl uğurlu filmlər Fondanın kassadakı populyarlığını qoruyub saxlayıb və o, "The Dollmaker" (1984) televiziya filmindəki roluna görə "Emmi" mükafatına layiq görülüb. 1982-ci ildə o, XX əsrin ən çox satılan VHS kaseti olan ilk məşq videosu "Jane Fonda's Workout"-u təqdim edib. Bu, növbəti 13 il ərzində ümumilikdə 17 milyondan çox nüsxəsi satılan 22 belə videonun ilki olub. İkinci həyat yoldaşı Tom Heydendən boşandıqdan sonra, 1991-ci ildə milyarder media maqnatı Ted Törnerlə ailə həyatı qurub və "Stanley & Iris" (1990) filmi ilə yekunlaşan bir sıra uğursuz layihələrdən sonra aktyorluq fəaliyyətini dayandırıb. Fonda 2001-ci ildə Törnerdən boşanıb və "Monster-in-Law" (2005) hiti ilə ekranlara qayıdıb. 2000-ci illərdə "Georgia Rule" (2007) onun yeganə filmi olsa da, 2010-cu illərin əvvəllərində o, karyerasını tamamilə yenidən canlandırıb. Sonrakı filmlərinə "The Butler" (2013), "This Is Where I Leave You" (2014), "Youth" (2015), "Our Souls at Night" (2017) və "Book Club" (2018) daxildir. 2009-cu ildə, 49 illik fasilədən sonra "33 Variations" tamaşası ilə Brodveyə qayıdıb və bu rola görə "Toni" mükafatının "Ən yaxşı aktrisa" nominasiyasına layiq görülüb. HBO-nun "The Newsroom" (2012–14) dram serialındakı əsas rollarından biri isə ona iki "Emmi" nominasiyası qazandırıb. O, həmçinin 2009-2012-ci illər arasında daha beş məşq videosu buraxıb. Fonda hazırda 2015-ci ildə nümayiş olunan və ona "Emmi" və üç "Ekran Aktyorları Gildiyası" mükafatı nominasiyası qazandıran Netflix-in "Grace and Frankie" komediya serialında Qreys Hanson obrazını canlandırır.