Kemal Sunal

Teatr və kino sənətçisi Kemal Sunal dünyaya gözlərini 11 noyabr 1944-cü ildə İstanbulun Küçükpazar səmtində açdı. Atasının adı Mustafa Sunal, anasının adı isə Saime Sunaldır. Kemal Sunalın Cemal və Cengiz adında iki qardaşı da var. Ömrü boyu 82 filmdə rol alan Kemal Sunal ibtidai təhsilini Mimar Sinan İbtidai Məktəbində alıb. Vefa Liseyindən məzun olan sənətçi ali təhsilinə Marmara Universitetinin Jurnalistika fakültəsində davam edib. Vefa Liseyindəki fəlsəfə müəllimi Belkıs Balkırın sənətçini Müşfik Kenter ilə tanış etməsi Kemal Sunalın həyatının dönüş nöqtəsi oldu. 1992-ci ildə çıxan tələbə amnistiyasından yararlanaraq Marmara Universiteti Kommunikasiya Fakültəsinin Radio və Televiziya şöbəsində təhsilini 2-ci kursdan davam etdirən Kemal Sunal 1995-ci ildə məzun oldu. Marmara Universiteti Kommunikasiya Fakültəsindən 1994-1995-ci tədris ilində məzun olan məşhur komediya ustası diplomunu Vefa Liseyindən dostu Uğur Dündarın əlindən alarkən, "4 illik marafonu mən 27 ilə tamamladım. Onsuz da mən liseyi də 11 ilə bitirmişdim" deyərək hər kəsi güldürmüş, lakin əzmli və qərarlı olanın əlindən heç nəyin qurtula bilməyəcəyini 51 yaşında universitet bitirərək sübut etmişdi. 1964-cü ildə hərbi xidmətini başa vurduqdan sonra Vefa Liseyində həvəskar olaraq "Zoraki Tabip" adlı teatr tamaşasında səhnəyə çıxmağa başladı. Kenterlər Teatrında peşəkar olaraq səhnəyə çıxdıqdan sonra sırasıyla Ulvi Uraz Teatrı, Ayfer Feray Teatrı və Devekuşu Kabare Teatrında çalışdı. Devekuşu Kabare Teatrında onu izləyən Ertem Eğilmez tərəfindən bəyənildikdən sonra 1973-cü ildə Ertem Eğilmezin rejissoru olduğu "Tatlı Dillim" adlı filmdə hündür boyuna görə basketbolçu kimi kinoya transfer oldu və həyatı dəyişdi. Kemal Sunal ömrü boyu cəmi 82 filmdə rol aldı. Təyyarə fobiyası olduğu bilinən və həyatında daha əvvəl heç təyyarəyə minməyən Sunal, 3 iyul 2000-ci ildə "Balalayka" adlı filmin çəkilişləri üçün Trabzona getmək məqsədilə mindiyi təyyarədə havaya qalxmazdan dərhal əvvəl keçirdiyi ürək tutması nəticəsində dünyasını dəyişdi.